10 Hindu Table Commandments

 🪷 *പത്ത് ഊണു (ഭക്ഷണ) നിയമങ്ങൾ*🙏🏼

 *1. ചൂടോടെ ഉണ്ണണം.* 

ചൂടുചോറിനേ രുചിയുളളൂ. അത് വയറിലെ തീയ്യിനെ (ദഹനശക്തിയെ) നിലനിർത്തുന്നു. ഉണ്ടത് ശരിയായി ദഹിക്കുകയും ചെയ്യുന്നു. വയറിൽനിന്നുളള വായുവിനെ നേർവഴിക്കാക്കുന്നു. ദേഹത്തിൽ കഫം കൂടിപ്പോകാതെ നോക്കുന്നു. അതുകൊണ്ട് ചൂടോടെ തന്നെ ഉണ്ണണം.

 *2. മയമുളളതുണ്ണണം.* 

മയമുളളതിനേ രുചിയുളളൂ. അത് വയറിലെ അഗ്നിയെ നില നിർത്തുന്നു. ശരീരത്തെ പരിപോഷിപ്പിക്കുന്നു. കണ്ണ് മുതലായ പഞ്ചേന്ദ്രിയങ്ങളെ കരുത്തുളളവയാക്കുന്നു. ശരീരബലം വർദ്ധിപ്പിക്കുന്നു. ദേഹത്തിന് സ്വാഭാവികമായ കാന്തിയുണർത്തുന്നു. അതിനാൽ മയമുളളതുണ്ണണം.

 *3. അളവറിഞ്ഞുണ്ണണം .* 

അളവറിഞ്ഞ് ഭക്ഷണംകഴിച്ചാൽ ദേഹത്തിൽ വാത-പിത്ത കഫങ്ങളുടെ സംതുലനാവസ്ഥ തകരാറിലാവാതെ ആയുസ്സ് ആരോഗ്യം ഇവ വർദ്ധിപ്പിക്കുന്നു. നീരും-ചണ്ടിയും വേർതിരിഞ്ഞ് വേണ്ടാത്തത് പുറത്തുപോകുന്നു. വയറിലെ അഗ്നി (ജഠരാഗ്നി) കെടാതെ കാക്കുന്നു. അതിനാൽ അളവറിഞ്ഞുണ്ണണം.

 *4. ദഹിച്ചശേഷമുണ്ണണം.* 

ആദ്യംകഴിച്ചത് ശരിയായി ദഹിക്കുംമുമ്പ് വീണ്ടുമുണ്ടാൽ പലവട്ടം പാകം വന്ന നീരുകൾ (ദഹനരസം) കൂടിക്കലർന്ന് ശരീരത്തിന്റെ സുസ്ഥിതി അവതാളമാകും. മറിച്ചായാലോ, വാതം തുടങ്ങിയദോഷങ്ങൾ തുല്യാവസ്ഥയിലെത്തി ശാരീരം നിലനിർത്തും. ശരിയായവിശപ്പുണ്ടാകും. കഴിച്ചത് വേണ്ടപോലെ ദഹിക്കും. ആയുസ്സ് പരിപാലിക്കപ്പെടും. അതിനാൽ ആദ്യം ഉണ്ടത് ദഹിച്ചശേഷമുണ്ണണം.

 *5. വിരുദ്ധമാവാത്തതുണ്ണണം.* 

കഴിക്കുന്ന സാധനങ്ങൾതമ്മിൽ ഒന്നിനൊന്ന് വൈരുദ്ധ്യമുണ്ടാവരുത്. പരസ്പരം ചേർന്നുപോകുന്നവയാകണമെന്നർത്ഥം. വിരുദ്ധങ്ങളായവ ശരീരത്തിൽ വിഷാംശമുണ്ടാക്കും. ശരീരസ്ഥിതി അപകടത്തിലാവും. ഉദാഹരണത്തിന് പുളിയുളള പഴങ്ങളും പാലും ഒരുമിച്ചാവരുത്. ചൂടുചോറിൽ തൈരു ചേർക്കരുത്. അങ്ങനെ...

 *6. സുഖമായിരുന്നുണ്ണണം.* 

മനസ്സിനു സമാധാനവും പ്രസാദവും ഉണ്ടെങ്കിലേ കഴിക്കുന്നത് പ്രയോജനത്തിലാവൂ. വെറുപ്പോടെ ഇരുന്നുണ്ടാൽ വകയ്ക്കുകൊളളില്ല. അതിനാൽ സുഖമായിരുന്നുണ്ണണം. പണ്ടൊക്കെ നിലത്തു പായവിരിച്ചു ചമ്രം പടഞ്ഞിരുന്നായിരുന്നു ഊണ് കഴിച്ചിരുന്നത്, അങ്ങനെ കഴിക്കുമ്പോൾ വയർ പരിപൂണ്ണമായി നിറയില്ല. 

 *7. തിടുക്കത്തിലുണ്ണരുത്.* 

ഊണിനു വേഗം കൂടിയാൽ ചോറു വഴിമാറും. ശരിക്കിറങ്ങാത്ത പോലെ തോന്നുകയും ചെയ്യും. രുചിയറിയുകയേയില്ല. ദോഷവുമറിയില്ല. അതിനാൽ ഊണിനു ഒരിക്കലും അതിവേഗംപാടില്ല.

 *8. തീരെപ്പതുക്കെയുണ്ണരുത്.* 

ഏറെപ്പതിഞ്ഞമട്ടായാൽ വയറു നിറയുന്നതറിയില്ല. അധികമുണ്ടു പോകും. കിണ്ണത്തിലെ ചോറ് ഇരുന്നാറും. ദഹനം ക്രമം വിട്ടാവും. അതിനാൽ ഊണ് തീരെവേഗതയില്ലാതെയും ആവരുത്.

 *9. മിണ്ടിയും ചിരിച്ചും ഉണ്ണരുത്.* 

ഉണ്ണുമ്പോളതിലാവണം ശ്രദ്ധ. മനം മറ്റൊന്നിലായാൽ അതിവേഗമുണ്ടാലത്തെ കുഴപ്പങ്ങൾ എല്ലാമുണ്ടാകും. അതിനാൽ ഉണ്ണുമ്പോൾ മിണ്ടാതെയും ചിരിക്കാതെയും ഉണ്ണണം.

 *10. അവനവനെ അറിഞ്ഞുണ്ണണം* 

ഊണിനുളളതിൽ ഇതെനിക്കു നന്ന് ഇതാപത്ത് എന്ന് തിരിച്ചറിഞ്ഞ് വേണ്ടതെന്നുളളതേ ഉണ്ണാവൂ.